د محصلانو ټولنه (شورا)
سپین غر پوهنتون (ننګرهار) د خپلو علمي، تحصیلي او څېړنیزو خدمتونو او فعالیتونو په لړ کې د پوهنتون برحاله محصلینو ټولنه (شورا) رامنځته کړې ده. په شورا کې د پوهنتون د اړوندو پوهنځیو د ټولګيو استازي، د ټولګي ممتاز او لومړۍ درجه محصلین او هغه محصلین، چې د لوړو استعدادونو او نوښتونو پر بنسټ په پوهنځي کې غوره ګڼل شوي وي، د ټولنې د غړو په توګه ټاکل کېږي.
دا شورا په پوهنتون کې د علمي، تدریسي، اداري او څېړنیزو فعالیتونو د لا معیاري کولو په موخه د نظرونو، وړانديزونو او په اړوندو برخو کې د چارو د ښه والي په موخه د شکایتونو راټولولو، تحلیل، او اړوندو څانګو سره د ستونزو د شريکولو، د ټولګيو له نورو محصلینو سره د پوهنتون د اهدافو، فعالیتونو او د پوهنتون له خوا د اړینو خبرتیاو او موضوعاتو شریکولو او په موخه رامنځته شوې او په ربعه وار ډول جلسات ترسره کوي. د محصلانو شورا د پورته عمده برخو ترڅنګ، لاندې اهداف هم په نښه کوي او په اړونده برخه کې فعالیت کوي.
د محصلینو ټولنې (شورا) عمده دندې
1. د پوهنتون ستراتېژيکو اهدافو د تحقق لپاره د محصلانو ملاتړ او همکاري جلبول.
2. د پوهنځيو او نورو برخو کلني پلانونو جوړونې پر وخت د محصلانو نظرونه اخيستل.
3. د پوهنځيو او نورو برخو د اجرأتو د غوره والي په اړه د محصلانو وړانديزونه اورېدل.
4. د پوهنځيو او نورو برخو له لورې د ترسره شويو فعاليتونو په اړه د محصلينو رضايت کچه معلومول.
5. د پوهنتون شموله علمي برنامو له تطبيق وړاندې محصلينو سره د يادو برنامو د بشپړ اغېزناکتوب په اړه مشوره کول.
6. د تدريسي، څېړنيزو او علمي نشراتو په اړه د محصلينو نظرونه اخيستل.
7. د استادانو او اداري کارکونکو سره د محصلينو د همغږۍ کچه لوړول.
8. د ازموينو، درسي لوست توکو منځپانګې او درسي مېتود د لا ښه والي په اړه د محصلينو وړانديزونه تر لاسه کول.
9. د لوړو زده کړو وزارت غوښتنو په رڼا کې - په ځانګړي ډول د محصلينو انضباطي پاليسۍ، عدالت او انصاف پاليسۍ، شکايتونو او نظم او ډسپلين پاليسۍ د تدوين او تطبيق په موخه - د محصلينو نظرونه اخيستل او په يادو پاليسيو کې يې ځای پر ځای کول.
10. د پوهنتون د پاليسيو پوره تطبيق په موخه د محصلينو ترمنځ عامه پوهاوی رامنځته کول.
د محصلينو ټولنې (شورا) جوړښت
1. د محصلانو چارو مرستيال د شورا رئیس په توګه.
2. د پوهنتون عمومي رئيس د شورا د غړي په توګه.
3. د علمي او اداري چارو مرستيالان د شورا د غړو په توګه.
4. د کيفيت لوړونې او علمي څېړنو آمر د شورا د غړو په توګه.
5. د کارموندنې او مشوره ورکونې آمر د (منشي) په توګه.
6. د درې ګونو پوهنځيو د ټولو برحاله ټولګيو اول نمره محصلين د شورا د غړو په توګه.
7. د درې ګونو پوهنځيو د ټولو ټولګيو استازي محصلين د شورا د غړو په توګه.
د ټولنې (شورا) د رئيس مسؤليتونه
1. د محصلينو سره په ربعوار ډول د مجلس يا په يو کال کې د څلورو مجالسو لپاره له ټولو غړيو څخه اجنډاوې غوښتل.
2. د محصلينو شورا تر جلسې وړاندې د کنفرانسونو په تالار کې د اړينو ترتيباتو په اړه ډاډ ترلاسه کول.
3. د شورا اجنډاوې او پرېکړې پروتوکول کتاب کې ليکل او پرېکړې ټولو اړوند برخو سره د اجرأتو په موخه شريکول (د شورا مُنشي).
4. د شورا غړيو محصلينو ترمنځ د نېکو اړيکو ساتلو لپاره کار کول.
5. د شورا غړيو محصلينو شهرت د شورا په فايل کې ساتل (نوم، د پلار نوم، آی ډي نمبر، کلاس کوډ، اړيکو شمېره، برېښناليک).
6. د شورا غړي محصلينو کې خوځښت او تحرک رامنځته کول، ترڅو د پوهنتون عمومي وضعيت د لا غوره والي او پرمختګ په موخه په مجلس کې مؤثرې، ګټورې او د تطبيق وړ نظرونه او طرحې وړاندې کړي.
د ټولنې (شورا) د غړيو مسؤليتونه
1. په ټاکلي وخت مجلس ته حاضرېدل.
2. د مجلس له اجنډاو ځان خبرول او په مجلس کې فعاله ونډه اخيستل.
3. په مجلس کې د نورو ګډونوالو نظرونو ته احترام درلودل.
4. په مجلس کې د لوړو زده کړو وزارت د لوايحو خلاف غوښتنه نه کول.
5. په مجلس کې ذکر شوي مسايل د نورو محصلينو او اداري کارکونکو سره - د مجلس د پرېکړو په رڼا کې - شريکول.
6. په مجلس کې د پوهنتون د پياوړتيا او پرمختګ لپاره هر ډول لنډ مهاله، منځمهاله، اوږدمهاله يا لږ لګښت لرونکي، ډېر لګښت لرونکي، بې لګښته يا پوهنتون شموله، ولايت شموله، زون شموله عملي – ټولنيز مسايلو اړوند طرحې وړاندې کول.